Proxección das obras gañadoras

Última oportunidade para ver as curtametraxes gañadoras nesta edición do Festival de Cans! O venres 27 de maio proxectaranse na Sala Ingrávida do Porriño (calle Pérez Leirós,3) as curtas e videoclips gañadores nesta XIII edición. Contarase coa presenza de varios realizadores que comentarán co público as súas pezas audiovisuais. Continúe lendo Proxección das obras gañadoras

Música pangalaica e os campións do punk

No apartado musical hoxe celebraremos os 25 anos da Arroutada Pangalaica dos Diplomáticos de Montealto, que se estrearon precisamente no Porriño. Agora pechan un ciclo cun concerto especial no que subirán ao escenario unha morea de amigos. Continúe lendo Música pangalaica e os campións do punk

Actividades para nenas e nenos festivaleiros

Os máis pequenos tamén teñen hoxe dende ben cedo actividades para escoller no Festival de Cans. O parque do río estará en funcionamento todo o día con xogos tradicionais e xantares con menús infantís a prezos económicos. Pola mañá poderán asistir á proxección da longametraxe de animación Maimiño, de Ernestro Padrón, unha produción de Ficción Producciones e o Instituto de Cine Cubano.

web_trioacivro

Alecrín Monicreques poñerá en escena tres historias de amizade, unha delas localizada en Cans e todas elas cheas de personaxes que buscan a felicidade. De novo haberá escolma de curtametraxes de animación na Caixa de Mistos, que este ano propón tamén un obradoiro de filmes para nenos. E o Trío Acivro, un pai e os seus dous fillos, ofrecerán unha actuación didáctica e informal, con música clásica, de bandas sonoras inspirada no penedo do Beethoven ou Pianista de Cans.

Lembrade que tanto os monicreques como a actuación do Trío Acivro requiren entrada, cun custe de 3€, e que estarán á venda nos respectivos espazos de cada actividade: o Baixo de Carlos e o Cuberto de Pato.

Consultade toda a información do MiniCans aquí.

Dalle caña ás curtametraxes

Repasamos o programa de mañá, día grande do festival. En total este ano participan 18 curtametraxes na sección oficial a concurso, que nos demostran a fecunda realidade do noso audiovisual. Recuperamos a sección de animación e descubrimos unha canteira de directores e directoras que crean desde o éxodo en Bruxelas, Londres ou Lisboa. Por primeira vez haberá un encontro con todos eles na Leira de Alicia-Espazo Mahou. É o Dalle Caña, un coloquio cun formato informal no que presentarán a súas producións e debaterán sobre a aventura de iniciarse no audiovisual.

Nun dos espazos de programación paralela do certame, o Jalpón de Alicia, inauguramos sección: “Retratos de Familia”. Nela recóllense as obras dunha serie de creadores e creadoras novos que afondan no entrono familiar para crear unha cinematografía non convencional, experimental, arriscada e con moita dor persoal.

Alí mesmo presentarase o novo videoclip dos Diplomáticos de Montealto, “A Rabaleira”, dirixido por Pulpiño Viascón; o documental Joao Tomba, el regreso, de Alberto S. Lozano e que relata a estraña historia deste mítico músico e os seus vínculos co rockeiro vigués Indy Tumbita; e catro pezas inéditas dos grupos da Compostela Yeyé dos 50-60, recuperadas por Alfonso Espiño.

O día grande máis multidisciplinar
Podemos afirmar que a de 2016 é a edición máis multidisciplinar da historia do certame e, no día grande, mañá sábado 21 de maio, ademais de cinema e música teremos actividades dedicadas á danza contemporánea, a videoperformance, a gastronomía, o humor gráfico ou a literatura.

janetymercedes4_baixa

A bailarina Janet Novás e a música Mercedes Peón estrearán un novo espazo do festival, o Jaliñeiro Area, co seu espectáculo “Falar”. Compartirán esta gran xaula, creada no seu día para a cría de aves, co público facendo unha intervención de música e corpo pensada para espazos insólitos.

Se a nosa canción oficial se converteu xa no hit da primavera, podemos avanzar tamén que teremos novela oficial. O escritor e xornalista Carlos Meixide, que protagoniza a nosa sección Miradas de Cans, presentará na Sala Multiusos Cans, a segunda entrega da súa saga de literatura xuvenil, que promete ser un bombazo e que está localizada na nosa aldea. Neste mesmo espazo veremos as videocreacións do grupo Cintaadhesiva, realizadas por Area Erina; a curtametraxe documental“Cadencia”, de Virginia Rota e protagonizada por Janet Novás; e o documental O equilibrio dos opostos, de Alberto Baamonde, que relata as peripecias do cociñeiro Javier Olleros para manter en pé o seu restaurante Culler de Pau. Relacionada con esta última proxección e inaugurando tamén novo espazo, a Cociña da Señora Esther, Olleros liderará a acción gastronómica desta edición, presentando a sobremesa que deseñou especificamente para o festival. Unha auténtica delicatessen canina!

Consultade o programa completo do sábado neste enlace.

“Buscando a superfama”, mellor viedeoclip

O xurado dos videoclips da XIII edición do Festival de Cans, formado por Déborah Vukusic, Pablo González Batista, Teresa Cuíñas e Amaro Ferreiro, acordou outorgarlle o Premio ao Mellor Videoclip a “Buscando a superfama” de Heredeiros da Crus, dirixido por Olga Osorio, por ser un videoclip no que imaxe e música dialogan en igualdade de condicións, por ser unha peza que amplifica unha canción moi pegadiza e reflicte moi ben o seu contido, por representar á perfección ao grupo e o seu espírito, e por mostrar un gran equilibrio entre medios de produción e creatividade.

O xurado quixo facer tamén unha mención especial ao videoclip “El último esfuerzo” de Manos de Topo, dirixido por Alejandro Marzoa, por transgredir as fronteiras do videoclip e convertelo nunha curtametraxe, por ser técnicamente impecable e pola súa capacidade para facer unha parodia do grupo que alcanza a outras formacións musicais coas que Manos de Topo adoita compartir escenarios.


Esta noite coñeceremos tamén o mellor viedeoclip e a mellor obra da Can Parade segundo o criterio do público.

Dúas novas estrelas no Torreiro de Cans

Durante a xornada de hoxe, dúas personalidades relevantes do noso cinema deixarán a súa pegada no Torreiro dás Estrelas. Farano nunha placa cunha estrela que, desde hoxe, levará o seu nome no firmamento de Cans.

Trátase do actor Quique San Francisco, quen conta con máis de 60 producións ás súas costas traballando con algúns dos mellores directores do cinema español, tales como José Luis Cuerda, Adolfo Aristarain, Luis García Berlanga, Imanol Uribe, Manuel Gutiérrez Aragón ou Álex da Igrexa. Está especialmente sinalado pola participación no denominado “cinema quinqui” de finais dos 70 e principios dos 80, deixando a súa pegada no xénero en películas como Colegas, Navajeros ou El pico. Nos últimos anos a súa cara sóanos pola de personaxes en series de televisión como Cuéntame como pasó ou Gym Tony e polas súas intervencións en El club de la comedia.

quique

Tras a súa participación na dobraxe de Psiconautas, o actor acudiu a Cans para acompañar a Pedro Rivero na presentación da película e deixará a súa pegada no Torreiro das Estrelas hoxe ás 13.30h.

Á noitiña, Keka Losada, presidenta da Asociación Cultural Arela, conducirá a noite das homenaxes, un espazo no que queremos recoñecer o traballo das nosas creadoras e creadores máis destacados. Será entón cando Emma Lustres recibirá o Premio Pedigree’16 polo seu traballo á fronte de Vaca Films, na que cultivou grandes éxitos para as súas producións. É o caso de películas como O Descoñecido, de Dani da Torre (Premios Goya á mellor montaxe e mellor son, con oito nomeamentos en total e que acaba de recibir 12 Mestre Mateo, con 15 nomeamentos en total) e Cela 211, de Daniel Monzón (oito Premios Goya, entre eles o de mellor película e mellor actor para Luís Tosar). Tamén contribuíu a visibilizar a numerosos profesionais galegos, tanto directores, como técnicos, actrices e actores e, principalmente, a novos realizadores. Por todo iso, o seu nome e as súas “poutas” quedarán gravados desde hoxe no noso pequeno-gran paseo da fama.

SOMOS GENTE HONRADA RODAJE PELICULA EN A CORUÑA EMMA LUSTRES Y SANDRA

Pero os recoñecementos non quedan aí. Durante a noite das homenaxes, entregaremos os nosos Chimpíns de Prata a dous veciños que son fundamentais para que o Festival se poida levar a cabo, Chelo Fortes e Manuel Cid, así como a Xurxo Souto, que coa súa personalidade irresistible cada ano destaca os lances que teñen lugar en Cans, unindo arte, espectáculo e a vida na nosa singular aldea.

Iván Ferreiro e Delafé, banda sonora do día das homenaxes

O audiovisual continúa a expandirse hoxe no Festival de Cans nunha xornada marcada pola posta en valor dos creadores e creadoras galegos. Máis como xa é habitual aquí, non todo é cinema e a parroquia anegarase tamén polas propostas musicais. Unha delas é a de Iván Ferreiro, que enche os oídos e os corazóns de milleiros de afeccionados ao mellor pop-rock dende que nos 90 Los Piratas tenderon pontes entre o indie e o mainstream. Leva 13 anos en solitario, ensanchando os camiños da súa música en media ducia de discos repletos de cancións brillantes: “Turnedo”, “El equilibro es imposible” ou “Años 80”. Iván Ferreiro estará en concerto as 20h00 na Leira de Alicia-Espazo Mahou, con acceso libre ata completar o aforo limitado a 400 persoas (as pulseiras para entrar poderán recollerse a partir das 17h00 no posto de merchandising do festival).

Pola súa banda, Óscar D’Aniello chega a Cans de estrea total. Primeiro, porque nos presentará o seu documental Ciao Pirla!, que narra a súa emotiva odisea en bicicleta dende Barcelona ata Milán para levar as cinzas do seu pai ao seu lugar de orixe. E segundo, porque trala súa aventura de máis duhna década con Delafé y Las Flores Azules, presenta o seu novo proxecto musical, Delafé, e o seu primeiro disco con esta nova formación, La Fuerza irresistible. Un arsenal de cancións vitalistas que consolidan unha versatilidade moi pouco común na composición musical: pop, hip-hop, soul, funk, electro, disco, o seu inconfundible parafraseado, a súa enerxía incombustible e a autoría de mensaxes bala.

web_angel_carmona

No noso novo espazo para o esparcemento, a Leira de Alicia-Espazo Mahou, haberá sesión DiscoChimpín con Edu Romero DJ. Vigués, baixista dos desaparecidos Nadadora, cofundador de Coconut Producciones e apaixonado da música. Como bo fan do underground dos 90s e dos ritmos bailables promete un dos momentos máis movidos do festival. Ángel Carmona, que hoxe foi o noso espertador coa emisión en directo dende Cans de Hoy empieza todo, será tamén o encargado do peche da festa. Doses de boa música e un compendio de axitados guitarrazos nunha sesión Disco Chimpín só apta para os máis animados.

Día dos creadores e as homenaxes

Mañá no Festival de Cans temos unha xornada ben cargadiña de cinema dedicada ás nosas creadoras e creadores, pero tamén das ondas da radio, xa que Ángel Carmona emitirá Hoy empieza todo de Radio 3 en directo dende Cans a partir das 7h00. Durante o programa haberá un almorzo “Galicia Calidade” preparado polo barista Óscar de Toro con produtos amparados pola marca con bollería do chef Iván Méndez. Galicia Calidade vén colaborando con Festival dende hai anos, achegando bo gusto gastronómico e converténdose nun dos nosos patrocinadores máis significativos.

Ás 10h00 dará comezo a estrea das mellores curtametraxes feitas por escolares en Cans do Futuro. Deseguido, o sector darase cita nun encontro aberto de CREA, a Asociación de Directores e Realizadores de Galicia, moderado por Jorge Coira e coa presenza de Alexia Muíños. Alexia formouse como actriz e directora en escolas de Nova York e Barcelona, onde actualmente traballa en distintas facetas do mundo audiovisual. Compaxina a dirección cinematografica co cargo de vicepresidenta da Asociación Europea de Mulleres no Audiovisual (European Women’s Audiovisual Network, EWA), dende onde traballa para acabar coa desigualdade de xénero na industria do cinema europeo.

Seguemento aos creadores galegos
Ademais de ser un escaparate do audiovisual galego, Cans tamén ten na súa filosofía seguir aos creadores e creadoras que pasaran por este festival ao longo da súa traxectoria. Así, “Fill@s de Cans” converteuse nas últimas edicións nunha das seccións máis emblemáticas do certame. Nela os cineastas mostran ante o público as primeiras imaxes inéditas dos seus filmes, en moitos casos aínda en posprodución. Nesta edición, poderanse ver as primeiras imaxes de A liña de sombra, o documental que o coruñés Nicolás Combarro prepara sobre o fotógrafo Alberto García-Alix; Esquece Monelos, a ópera prima da cineasta Ángeles Huerta; Sicixia, o novo filme de Ignacio Vilar; a coprodución galego-uruguaia Migas de pan, de Manane Rodríguez; e Dhogs, as historias cruzadas made in Galicia que propón Andrés Goteira.

Pola súa banda, na sección “A que andas?” coñecerase o estado das primeiras longametraxes de Sonia Méndez, Alexia Muíños e David Hernández, así como do novo filme de Ramón Costafreda e do novo documental de Andrea Zapata-Girau. Boa parte deles xa participaran na sección competitiva ou noutras seccións de anteriores edicións de Cans.

SOMOS GENTE HONRADA RODAJE PELICULA EN A CORUÑA EMMA LUSTRES Y SANDRA

Noite das homenaxes
Coa noite, chegan as estrelas a Cans. A partir das 22h00 no Torreiro, Keka Losada e Federico Pérez farán entrega do Premio Pedrigree’16 á productora Emma Lustres, unha figura clave no cinema galego actual a través da súa empresa Vaca Films. Xa cunha longa traxectoria, ten colleitado grandes éxitos para as súas producións proporcionándolle unha gran visibilidade a numerosos profesionais galegos. É o caso de filmes como El Desconocido de Dani de la Torre e Celda 211 de Daniel Monzón. O festival quere recoñecer a súa sólida carreira e sobre todo a súa labor como impulsora dos profesionais galegos, tanto directores, como técnicos ou actrices e actores e novos realizadores.

cid

Do mesmo xeito, a organización do festival fará entrega dos Chimpíns de Prata ‘Premio Pepe Puime’ a Chelo Fortes e Manolo Cid, donos da “Casa do Cid”, que prestan apoio loxístico durante os días do evento para que alí poidan xantar os convidados do festival e ten feito en sucesivas edicións de cociña, sala de prensa, almacén ou lugar de reunión do xurado. Tamén se entregará este premio a Xurxo Souto, escritor, guionista e coñecido sobre todo como músico e cantante dos Diplomáticos de Monte Alto. Souto realiza un roteiro sonoro pola parroquia, que este ano repetirá con sorpresas durante a mañá do sábado do festival.

Xurxo_Souto2

Tamén farán entrega do premio á mellor obra da Can Parade e ao mellor videoclip; e proxectaranse o making of de Cans 2015, “O ano da ducia” -de Roi Guitián e María Lobo-, e o trailer do “Proxecto bar”, unha iniciativa cun obxectivo dobre: rescatar a memoria dos bares que están pechados na aldea e estimular ás veciñas e veciños de Cans para que se lancen á produción audiovisual.

Consulta o programa do venres aquí.
E o programa completo aquí.

“Psiconautas”, unha fantasía negra de animación

Esta mañá presentouse no Círculo Recreativo e Cultural do Porriño Psiconautas, o filme de estrea de Cans 2016. Tras gañar o Premio Lurra Green Peace do Festival de San Sebastián en 2015 e, máis recentemente, o premio á Mellor Película de Animación no Golden Kuker-Sofia e o Stuttgart Film Festival, chega para proxectarse na súa estrea galega ante o público do festival. Tal e como apuntou o seu codirector, Pedro Rivero, “péchase así unha etapa do filme que comezou coa curtametraxe Birdboy, que gañou en Cans no 2011″. O director describiu ao filme como “unha fantasía negra realista de animación para adultos, pero tamén para todos os púlicos” e quixo destacar que “hoxe en día a produción de obras de animación en Europa está medrando e xa non se limita soamente a países asiáticos”.

Enrique San Francisco, actor de dobraxe do filme, quixo facer fincapé na súa ledicia ao compartir de novo proxecto con Pedro e avanzaron que esta non será a última. Tamén quixo lembrarse dos novos realizadores e realizadoras, filosofía que comparte coa esencia do festival, e das dificultades económicas que ás veces teñen para sacar os seus proxectos adiante.

Alfonso Pato, director do Festival de Cans, pola súa banda, salientou a parte galega da produción de Psiconautas, levada a cabo pola produtora Zirzocine, alegando que “os seus impulsores, Farruco Castromán e Luís Tosar, sempre amosan o seu apoio ao festival intentando vir a el edición tras edición cos filmes que producen”. Tamén amosou o seu apoio ao certame María José Giráldez, presidenta do Círculo Recreativo e Cultural do Porriño, amosando o seu desexo de poder colocar o can amarelo, emblema do festival, nos próximos anos e agardando “mil primaveras máis para Cans”.

rolda_psiconautas2_web

Can Parade

Can Parade

Inauguración xoves 19 | 21h30 | Rúa San Sebastián (O Porriño)

CanParade

A silueta do Can de Cans atópase en todas partes: é perfectamente recoñecible e está sempre preparada para vivir novas reinterpretacións. Cada ano, un feixe de artistas de toda caste atrévese a darlle unha nova volta creativa á nosa icona: é a Can Parade, a cita anual do festival coa creación artística máis puxante.

Este ano escollemos a través dunha convocatoria aberta a nove novos creadores e creadoras de toda Galicia e mesmo un de Valença, das máis diversas disciplinas e estilos, que se atreverán a empregar a silueta do can como soporte:

1. Ari Quintas
2. Xiomara Lago
3. Isa Albela (BOH Galicia)
4. Pablo Solla
5. ARi Magritte
6. Dani Prieto (Shoooty)
7. Isis Rodríguez
8. KAMBIO Studio
9. Antonio Fernandes CanasNunes

E como Cans celebra o Ano Castelao, a súa obra gráfica e plástica inspirará boa parte dos traballos desta edición.

A Can Parade preséntase o xoves no Porriño e as figuras poderán verse tamén o sábado en Cans. O público votará por aquela peza que máis lle guste e o/a gañador/a recibirá un Can de Pedra.

O actor Enrique San Francisco colocará a súa estrela no Torreiro de Cans

Enrique San Francisco, actor que prestou a súa voz para un dos personaxes principais de Psiconautas -o filme de estrea da XIII edición do festival- presentará o próximo xoves 19 a longametraxe no Circulo Recreativo e Cultural do Porriño. Continúe lendo O actor Enrique San Francisco colocará a súa estrela no Torreiro de Cans

Mañá terá lugar a venda física de entradas en Cans!

Tras esgotar as entradas dispoñibles online, o Festival de Cans venderá mañá, venres 13 de maio ás 19h00 no Torreiro de Cans, a últimas 100 entradas para acudir á proxección das curtametraxes a concurso desta edición. Continúe lendo Mañá terá lugar a venda física de entradas en Cans!

Canstelao en Chimpín

Canstelao en Chimpín

Sabado 21 | Todo o día | En todo Cans

O Festival de Cans súmase ao Ano Castelao con diferentes actividades espalladas de forma transversal en todo o programa para celebrar as tres efemérides que reúne o 2016 relacionadas co polifacético autor, artista e intelectual: o centenario da súa chegada á cidade de Pontevedra, o 75 aniversario da estrea da súa obra de teatro Os vellos non deben de namorarse e o Día das Artes Galegas, que este ano se dedica a este autor.

  • Realizarase un pase especial da copia recuperada de Miss Ledyia, primeira ficción galega na que intervén Castelao como actor, con música de theremin en directo composta para a ocasión por Paulo Nimoy. Promete ser unha das sesións máis especiais desta edición!
  • Proxectarase unha viñeta de Castelao ao comezo de cada sesión e o noso debuxante do Voulevar desta edición, Siro López, dedícalle unha das viñetas que realizou para o Festival. Todo isto para lembrar a súa faceta como debuxante e humorista gráfico.
  • A Banda de Música de Rubiós interpretará na sesión vermú do sábado a canción “Lela”, que escribiu Castelao precisamente para a estrea de Os vellos non deben de namorarse. Repartirase a letra entre o público para cantala a coro e que nos escoiten en toda a comarca.
  • Xurxo Souto comentará historias na ruta sonora sobre as excursións que Castelao facía cos seus vellos amigos galeguistas que andaban polo Porriño: o fotógrafo Luis Ksado, o escritor Ramón Cabanillas, Paz Andrade, o arquitecto Antonio Palacios, etc.
  • E na Leira de Alicia teremos instalado un photocall para a ocasión: un chimpín cos elementos míticos do atuendo de Castelao para transformarse nun auténtico intelectual galeguista con gafas e chapeu.

Coloquio na Leira

Coloquio na Leira

Con Emma Lustres e Dani de la Torre

Sábado 21 | 12h00 | Leira de Alicia-Espazo Mahou

emma_dani

Lustres e De la Torre son produtora e director dunha das películas de maior éxito de 2015: El desconocido. Estreada a finais de setembro, superou o medio millón de espectadores en salas de cine e acadou oito nominacións aos Goya, logrando dous: mellor montaxe e mellor son. Para Emma Lustres supuxo un novo fito na traxectoria de Vaca Films, como antes ocorrera con filmes como Celda 211, Invasor ou El niño. A Dani de la Torre serviulle para poñer o seu nome na primeira liña no seu debut na dirección de longametraxes, logo de anos entregando curtas de gran calidade como Bos días, Lobos e Minas. Agora o cineasta monfortino traballa xa no guión da súa seguinte película, que de novo producirá Lustres. Unha e outro teñen moito que dicir para explicar como se pode facer desde Galicia cine de acción que logre o recoñecemento de público e crítica.

Enrique San Francisco

Enrique San Francisco

Xoves 20 | 20h00 | Círculo Recreativo e Cultural (O Porriño)
Venres 20 | 13h30 | Torreiro das Estrelas

EnriqueSanFrancisco1

Debutou no cinema con tan só seis anos, no teatro dous anos despois e na televisión con dez. É un actor con carreira de fondo, que traballou cos grandes directores españois, dende José Luis Cuerda a Adolfo Aristarain, Luis García Berlanga, Imanol Uribe, Manuel Gutiérrez Aragón ou Álex de la Iglesia. Está especialmente sinalado pola participación no denominado “cine quinqui” de finais dos 70 e principios dos 80, deixando a súa pegada no xénero en filmes como Colegas, Navajeros ou El pico. Nos últimos anos a súa cara sóanos pola de personaxes en series de televisión como Cuétame como pasó ou Gym Tony e polas súas intervencións en El club de la comedia.

Está en Cans pola súa participación na dobraxe de Psiconautas e deixará a súa pegada no Torreiro das Estrelas.

Encontro aberto de CREA

ENCONTRO ABERTO DE CREA (ASOCIACIÓN DE DIRECTORES E REALIZADORES DE GALICIA)

Moderado por Jorge Coira
Coa presenza de Alexia Muíños

Venres 20 | 10h30 | Baixo de Moncho

alexia1_web

Alexia Muíños formouse como actriz e directora en escolas de Nova York e Barcelona, onde actualmente traballa en distintas facetas do mundo audiovisual. Dirixiu varias curtas de éxito antes da súa primeira longametraxa, Noche transfigurada. En 2014 fundou a produtora Marineda Films e agora está desenvolvendo o que será o seu segundo filme, As troitas cantan ao mencer, con Abano Producións, e que presentará na sección “A que andas?”.

Compaxina a dirección cinematografica co cargo de vicepresidenta da Asociación Europea de Mulleres no Audiovisual (European Women’s Audiovisual Network, EWA), dende onde traballa para acabar coa desigualdade de xénero na industria do cinema europeo. A EWA presentou recentemente os resultados dunha investigación de dous anos realizada en sete países, na que concluíu que só o 20% da produción europea está dirixida por mulleres e que o 84% da financiación pública vai parar aos proxectos masculinos. O estudo acadou unha gran representación internacional e Alexia Muíños participou na súa presentación nos festivais de Venecia, Málaga, Sevilla, Praga e na Berlinale. Ten moito que contar ao respecto e quere facer reflexionar ao público sobre a discriminación evidente das mulleres tamén neste sector.

Corcomidas

Exposición CORCOMIDAS

Sábado 21 | Inauguración ás 11h30 | Leira de Pedreiro

Corcomidas

Os deseñadores de Reizentolo, o cociñeiro Xosé Cannas e a Cociña Gráfica do Colexio Hogar de Vigo únense nun proceso creativo singular. A partir de produtos galegos coma os pementos ou o viño de barrantes, traballaron nun proceso de despigmentación ata lograr cores que se puidesen aplicar á reprodución gráfica. Amosamos o primeiro resultado do proxecto na Leira de Pedreiro.

“O ano da ducia”

O ano da ducia

Making of do Festival de Cans de 2015

2015 | 22′ | Galego

Realizado por María Lobo e Roi Guitián

Producido por Gingko para o Festival de Cans

Venres 20 | 22h30 | Torreiro de Cans

ano_ducia2

Os chimpíns, o agroglamour ou os espazos fan do Festival de Cans unha celebración da cultura popular cunha personalidade propia. Neste making veciños, visitantes e artistas intentarán definir os doce símbolos que o singularizan. Namentres, veremos a José Luis Cuerda falando nunha leira de cousas que se supón que sabe, a Luar na Lubre tocando nunha placa ou o Torreiro de Cans cheo a máis non poder. Perdícheste a 12ª edición do festival? Estiveches nela e queres revivila? Veña, dalle ao play e descubre cal é a ducia de Cans.

Iván Ferreiro

Iván Ferreiro

Venres 20 | 20h00 | Espazo Mahou

Ferreiro

A súa voz rota, a emoción que destilan as súas cancións: Iván Ferreiro enche os oídos e os corazóns de milleiros de afeccionados ao mellor pop-rock desde que nos 90 Los Piratas tenderon pontes entre o indie e o mainstream. Leva 13 anos tocando en solitario, ensanchando os camiños da súa música en media ducia de discos nos que abundan as referencias cinematográficas: “El viaje de Chihiro”, “El dormilón”, “Solaris”, “Fotogramas”, “Estrella de la muerte” ou “Rocco Sigfredi”, entre outras cancións. Un músico de cine que nos acompañou en varias ocasións e que este ano ten papel protagonista en Cans.

* O aforamento do concerto de Iván Ferreiro está limitado a 400 persoas. Para acceder hai que recoller unha pulseira acreditativa. Distribúense a partir das 17 h no posto de merchandising da organización.

+ info: web | Facebook

Booktrailers

BOOKTRAILERS

1ª Escolma de Booktrailers
Sección coordinada por Teresa Cuíñas
Mércores 18 | 16h30 | Baixo de Bugarín

Coa presenza de:

  • Fran Alonso, subdirector de Xerais
  • Noel Queipo, realizadora
  • Diego Giráldez, escritor
  • Tamara Andrés, escritora
  • Antón Veiga, realizador

Cos booktrailers está emerxendo un novo espazo para a creación audiovisual. Desde creadoras novas como Noel Queipo ata realizadores recoñecidos como Mario Iglesias, pasando pola vía máis experimental de Esferobite, estamos ante unha nova porta para a creación que mestura literatura e audiovisual. Por vez primeira, un festival audiovisual como Cans quere abrir unha reflexión ante esta irrupción imparable. Serán unha moda ou chegarán para quedar?
Proxecións:

1. Berta Dávila, O derradeiro libro de Emma Olsen, Galaxia, 2013. Peza de Noel Queipo
2. Antón Riveiro Coello, Os elefantes de Sókurov, Galaxia, 2015. Peza de Noel Queipo
3. Diego Giráldez, Galería de saldos, Xerais, 2016 (inédito). Peza de Antón Veiga (inédita).
4. Xesús Constenla, A rotura das paisaxes, Xerais, 2016. Teaser de Mario Iglesias
5. Tamara Andrés, Amentalista, Diversidad Literaria, 2015. Peza de Adrián González
6. Dores Tembrás, Cronoloxía da urxencia, Espiral Maior, 2014. Peza de Esferobite con música de Benxamín Otero
7. María do Cebreiro, O deserto, Apiario, 2015. Peza de Numax
8. Carlos Oroza, Évame, Editorial Elvira, 2013. Peza de Rubén Romero e Pablo Villalobos

Cans do futuro

CANS DO FUTURO

Mércores, xoves e venres | Pola mañá | En Cans

cansfuturo1

Rapaces de colexios e institutos de toda Galicia veñen cos seus centros a Cans nas mañás que van de mércores a venres nas datas do festival. Os estudantes terán como en anos anteriores encontros con actores e directores que van pasar polo festival e coñecerán a través de monitores formados a facer diferenciacións entre as diversas obras, saber as características dunha ficción, dun documental, dunha webserie ou dun videoclip, por exemplo.

Cada centro educativo está en Cans unha mañá enteira. Alí asisten a unha serie de encontros con actores e actrices, organizados por Aisge (Artistas Intérpretres, Sociedad de Gestión), polos que nesta edición pasarán, entre outros, Federico Pérez e Isabel Blanco. Ademais teñen unha visita guiada pola aldea, un pase de curtas exclusivo para eles e, no tempo de descanso, poden facerse a típica foto de Cans enriba do chimpín que se aparca xunto o Can de Pedra.

Este ano reforzamos tamén esta sección cun concurso de curtametraxes organizado en colaboración coa Secretaría Xeral de Política Lingüística. As mellores pezas proxectaranse en Cans como premio.

Siro López

Siro López

Viñetas no Cans Voulevar

Inauguración o venres 20 | 19h30 | No Cans Voulevar

siro2

Cada ano o festival proponlle a un humorista gráfico que debuxe a súa visión de Cans e o cinema. Primeiro foi Luis Davila “O Bichero”, logo Xosé Lois “O Carrabouxo” e o ano pasado Xaquín Marín. Agora é a quenda de Siro López (Ferrol, 1943). Pintor e debuxante, pasou máis de trinta anos da súa vida facendo debuxo de humor e caricatura política en distintas publicacions galegas, nomeadamente para La Voz de Galicia. Ten publicados máis de 15 álbumes de temática variada, nos 90 deseñou a praza do Humor da Coruña e máis recentemente os murais do porto de Ribadeo. Expuxo individualmente nos principais espazos expositivos galegos e en Madrid, Bilbao, Barcelona, Vila Real e Lisboa, e a súa obra está representada nas principais coleccións artísticas de Galicia.

Unha das súas viñetas estará centrada na conmemoración do Ano Castelao.

Ponme a última!

Proxecto Bar

Estrea de Ponme a última! Memorias dos bares de Cans

Mércores 18 | 21h00 | Baixo de Bugarín

CartazPonmeaultima

Por vez primeira Cans botou a andar un proxecto colectivo que está sendo apaixonante: o Proxecto Bar. Desde o mes de xaneiro, dez veciñas e veciños da aldea de entre os 12 e os 60 anos recibiron durante varios meses clases de documentación, guión, edición e montaxe. Coordinados polo realizador Juanma Lodo, por vez primeira teremos unha obra audiovisual creada, gravada, producida e editada polos propios veciños da parroquia. Será unha curta documental sobre a memoria dos bares pechados de Cans. Chámase “Ponme a última!”, e a estrea o mércores 18 de maio promete ser un dos grandes acontecementos dos últimos anos na aldea.

Ponme a última!
Dirección: Juanma LoDo
Guión: Alfonso Pato e Juanma LoDo
Produción: Andrea Durán
Equipo de documentación, gravación, edición e montaxe: Ainhoa Cabaleiro, Raúl Rodríguez, Antía Gándara, Raúl Maceira, Alba Sobrino, Marta García, Josér Ramón, Ángel Rodríguez e Flora Maceira
Vai de: a través das lembranzas das veciñas e veciños de Cans, facemos un percorrido polas memorias dos seus bares xa fechados, importantes centros sociais para un lugar que medrou pegado a unha estrada. Neles paraban os arrieiros cos cabalos, había teatro, contábanse contos, bailábase, namorábase, pelexábase e parte da historia cotiá das últimas décadas escribiuse neles.
Xénero: curtametraxe documental

Producido pola Asociación Cultural Arela, organizadora do Festival de Cans.
Realizado a partir dunha idea orixinal de Alfonso Pato.

CanSonoro

CANSONORO
Sábado 21 | 10h00 | Saída dende o Can de Pedra

Cansonoro2

Desde hai tres anos, o músico e escritor Xurxo Souto guía polas corredoiras de Cans un roteiro baseado nas historias dos veciños e na memoria musical de cada casa. Acompañado polos acordeonistas de Acordecans, que fan a ruta con él, Souto conta historias, interactúa, canta cos veciños e intercala diálogos de filmes no seu discurso. Unha proposta diferente que fascina a veciños e visitantes. Nesta edición as súas historias partirán dos curiosos nomes da toponimia local, como o Camiño Fundo ou Cobaladra.

Así mesmo, con motivo do Ano Castelao, contará historias das excursións que Castelao facía cos seus vellos amigos galeguistas que andaban polo Porriño: o fotógrafo Luis Ksado, o escritor Ramón Cabanillas, Paz Andrade, o arquitecto Antonio Palacios, etc.

O pasado ano máis de 100 persoas estaban en pé o sábado a primeira hora da mañá para seguir ao “guía” Souto. Todo un récord tendo en conta que a maioría non irían para a cama antes das 5 da mañá do día anterior.

Cansonoro3

Cans Proxecta

CANS PROXECTA

Territorio e coparticipación

WEB_CANS_PROXECTA2

Desde hai varios anos, o Festival de Cans mantén unha frutífera relación coa Escola Superior de Arquitectura da Universidade da Coruña. Unha relación que se materializa nas accións que moitos futuros arquitectos plasman como construcións efémeras no Festival de Cans para provocar unha reflexión sobre o territorio e a paisaxe.

Este ano, este traballo irá encamiñado a un obxectivo, como é tratar de “Buscar a Sombra” en varios espazos do festival que teñen carencias de sombra, sobre todo no Parque do Río. Desde hai varios meses, unha ducia de futuros arquitectos traballan neste proxecto que se plasmará nos días do Festival de Cans. Estes arquitectos traballan coordinados por profesores do prestixio de Emilio Rodríguez Blanco, Juan Creus e Jesús Irisarri, a través do grupo de investigación “Cidade e paisaxe”.

Retomamos a venda de entradas!

A partir do mércores 4 de maio ás 12h00 poñeranse á venda on line máis entradas para esta edición do Festival de Cans, que darán acceso á proxección da sección oficial de curtametraxes a concurso do sábado 21 de maio. Poderán adquirirse a través da nosa tenda virtual  ata o próximo 11 de maio ás 23h59. Continúe lendo Retomamos a venda de entradas!