O Festival de Cans, Premio da Cultura Galega 2018

O Festival de Cans recibirá este ano o Premio da Cultura Galega na modalidade de audiovisual. É unha gran noticia para o noso festival, xa que este recoñecemento, é un dos premios máis relevantes da cultura galega. Continúe lendo O Festival de Cans, Premio da Cultura Galega 2018

NACE “PROXECTA”, COORDINADORA DE FESTIVAIS DE CINEMA DE GALICIA

Este martes 18 de decembro presentouse no Museo das Peregrinacións de Santiago Proxecta, a que será histórica primeira coordinadora de festivais de cinema de Galicia.

Proxecta nace para poñer en primeiro plano o impacto social, económico e educativo dos festivais de cine en Galicia, que maioritariamente organizamos actividades durante todo o ano, e educamos ó público nun espírito crítico e en valores didácticos.  O Festival de Cans ocupará unha vocalía, a través do seu director Alfonso Pato, na primeira xunta directiva desta coordinadora que, polo de agora, agrupa a doce festivais pero que en breve aumentará o seu número nos primeiros meses do ano, posto que outros catro solicitaron xa o ingreso.

A primeira xunta directiva estará presidida polo noso colega de Play-Doc Ángel Sánchez, con Ana Estévez da MICE (Mostra de Cine Etnográfico) de Santiago como vicepresidenta, Pela del Álamo de Curtocircuito como secretario e Manuel Pena de Fic Bueu como tesoureiro.

OS GOYA PASAN POR CANS

O Festival de Cans quere dar os seus parabéns a todas as galegas e galegos nominados ós Premios Goya, a maioría moi ligados ás últimas edicións de Cans onde foron recoñecidos con múltiples premios.

Javier Gutiérrez, nominado a mellor actor por “Campeones”, levou o premio a mellor actor en Cans en 2014 pola curta “Tupper”, e  o premio Pedigree de Honor en 2015. Luis Zahera, nominado a mellor actor de reparto por “El Reino”, levou o Can de Pedra en Cans a mellor actor en 2008 pola curta “Conversa cunha muller morta”, e en 2012 por “Rosita y Jacinto”.

Para o festival tamén é unha enorme satisfacción ver entre os nominados á mellor curta de ficción a Álvaro Gago e na mellor curta de animación a Chris CembeGago está nominado por “Matria”, que na pasada edición bateu o récord de Cans de Pedra da historia do noso festival, o acadar catro recoñecimentos. Ademáis en 2015 tamén gañou en Cans coa curta “Curricán”. Pola súa parte, o cangués Chris Cembe, que está nominado pola curta de animación “Soy una tumba”, gañou o Festival de Cans en 2016 coa curta de animación “Viaje a Pies”. As nominacións completánse co músico de Catoira, Manu Riveiro, nominado con Xavi Font á mellor banda sonora polo filme “La Sombra de la ley”. Riveiro gañou en Cans o premio á mellor banda sonora orixinal pola música da curta de animación “The Magic oven”.

O cadro de honor complétase coas 6 nominacións de “La Sombra de la ley” de Dani de la Torre, e a nominación a mellor documental de “Sad Hill desenterrado” de Guillermo de Oliveira. En Cans tivemos o privilexio de ver as primeiras imaxes destes dous filmes, na sección “Fillxs de Cans”. 

Cans tamén quere felicitar a Ángel de la Cruz, coguionista e coprodutor do filme de animación “Memorias de un hombre en pijama”, nominado a mellor película de animación e á maquilladora Raquel Fidalgo, tamén nominada.

Todas estas nominacións ratifican o traballo do noso festival, tanto na selección dos traballos como no apoio ás novas creadoras e creadores. Viva o cinema galego e viva Cans!

O FESTIVAL DE CANS E A EMPRESA CARLIN ENTREGAN A RAPAZAS E RAPACES DA ALDEA VALES DE MATERIAL ESCOLAR

O Festival de Cans continúa traballando ó longo do ano no seu obxectivo de servir como ferramenta para contribuir á educación e achegar a cultura ó mundo rural. Estes días fixemos entrega a 23 rapazas e rapaces da aldea de vales para canxear material escolar nos comercios de Carlin, por un valor de 20 euros.

Entre estes nenos e nenas hai un grupo que colaboran no festival como guías dos camiños, e que teñen entre 8 e 14 anos, e outro grupo a partir de 15 anos que antes foron guías e agora están sendo formados en labores de produción e outros departamentos. Á entrega destes vales no Torreiro de Cans asistiu a veciña de Cans Rosa Bernárdez, que é a persoa que coordina a actividade destes rapaces e rapazas durante os días do evento.

Desde a organización do Festival de Cans sentímonos moi orgullosos de poder conceder estas axudas en material escolar para o novo curso, e devolverlle a estas nenos da aldea a ilusión coa que colaboran co festival.

Temos que coidalos porque eles serán o noso futuro!!!

Ata sempre Divina

O Festival de Cans lamenta o falecemento da popular veciña da parroquia Divina Campos, coñecida como Divina do Castillo, que nos deixou ós 86 anos. No ano 2012, o festival concedeulle o Chimpín de Prata como recoñecimento ó seu apoio ó festival e á súa colaboración entusiasta, poñendo este galardón no Muro dos Chimpíns.

Continúe lendo Ata sempre Divina