XURADO FURACANS-NOVAS CAMADAS

 

Javier Tolentino, cineasta e xornalista. Xornalista radiofónico cunha traxectoria de máis de trinta anos ligada aos micrófonos de Radio Nacional de España, á fronte durante case dúas décadas do mítico programa especializado en cine de autor, El séptimo vicio, en RNE3. En 2020, Tolentino deu o salto á dirección cinematográfica con Un blues para Teherán, película rodada en Irán e estreada no Festival Internacional de Cine de Moscú. Co seu debú cinematográfico foi finalista dos premios Goya ó mellor documental.

José Manuel Sande, historiador, xestor e produtor. É programador da Filmoteca de Galicia. Membro da comisión de axudas selectivas do ICAA, conta cunha extensa traxectoria como xestor cultural e divulgador. No eido do cinema, contribuíu ao traballo de investigación do documental 50 años en el andamio (Ángel Rueda, 2008) e foi guionista e coprodutor da longametraxe Arraianos (Eloy Enciso, 2012). Escribe en Caimán. Cuadernos de cine e na revista Luzes, da que é membro fundador, e tamén no blog especializado Acto de primavera.

Ana Estévez, museóloga e historiadora. A viguesa Ana Estévez é directora da MICE, a Mostra Internacional de Cinema Etnográfico de Santiago de Compostela, un espazo de difusión e encontro entre o cinema e as ciencias sociais. Responsable da área de Educación e Acción Cultural do Museo do Pobo Galego, tamén ocupa o cargo de vicepresidenta de Proxecta, a coordinadora galega de festivais de cine.