O Festival de Cans, cuxa XXII edición terá lugar entre o 20 e 24 de maio, estreará nesta edición un novo roteiro cinéfilo-literario pola aldea. Este roteiro parte dun novo libro da recoñecida escritora de literatura xuvenil Iria Misa, que leva traballando na idea máis de dous anos, nos que realizou estadías periódicas en Cans no marco das Residencias Artísticas que promove o certame.
O libro de Misa “Unha veciña de película: a excursión a Cans”, cuxa trama acontece durante o Festival de Cans, será publicado a mediados de febreiro por Edicións Xerais, e conta co traballo de Laura Suárez como ilustradora. Iria Misa (Gondomar, 1983) é unha das escritoras galegas más recoñecidas na literatura infantil e xuvenil e foi galardonada con prestixiosos premios como o Jules Verne en 2016, co libro “Xa non estou aquí”, ou o Premio Agustín Fernández Paz en 2021, polo libro “A cidade do átomo”.
O novo libro que agora vai publicar arredor do Festival de Cans, tivo xa un preámbulo no anterior “Unha veciña de película” (Edicións Xerais, 2023), cuxa protagonisa recibe o nome de Alice, en homenaxe á cineasta pioneira Alice Guy. Neste novo traballo Alice é de novo a protagonista, xunto a un grupo de rapaces que se introducen nos vellos documentais filmados na aldea, arredor do estrapelo, da canteira de Cans e da histórica mestra Dona Sara. Deste xeito, os rapaces mergúllanse na historia e na memoria da aldea grazas á maxia das imaxes.
A trama discorre por diferentes lugares reais da aldea e espazos icónicos de Cans coma o Torreiro das Estrelas, o Can de Pedra ou o Muro dos Chimpíns, e durante os días do festival axudará a proxectar entre os estudiantes a singularidade de Cans e o valor da cultura nos entornos rurais, á vez que promove a lectura entre os máis novos.
Deste xeito, a nova obra de Iria Misa abrirá un novo roteiro cinéfilo-literario, que será percorrido os días do festival por escolares que lean previamente o libro. A idea é continuar o relevo do libro “Cans”, escrito por Carlos Meixide con ilustracións da pintora María Meijide. A obra tamén naceu a partir das Residencias de Cans, e está a ter un enorme éxito, con perto de 2.000 libros vendidos. Máis dun milleiro de rapaces fixeron xa este roteiro en Cans, arredor de 200 só na última edición do festival.
O Festival de Cans busca desde hai anos crear un corpus de libros arredor da aldea e das sinerxias que crea o festival. Ademáis deste novo libro de Iria Misa e do xa citado de Carlos Meixide, anteriormente Cans tamén promoveu a edición do libro “A gran epopea do pianista de Cans” (Auga Editora), de Xosé Antón Perozo e o libro “Metodoloxía de eventos culturais: o caso do Festival de Cans”, que saíu da tese de doutoramento do estudioso Fran Núñez, agora director do Centro Dramático Galego (CDG) e editado pola Xunta de Galicia.