Sección Oficial: FuraCans (non ficción)

Por primeira vez na súa historia, o Festival de Cans incorpora na súa Sección Oficial unha competición de curtametraxes de non ficción, que leva o nome de FuraCans, recollendo o nome da mostra de filmes arriscados de anos anteriores. Deste xeito, outorga un espazo preeminente a aqueles filmes que exploran as diferentes variantes do documental, dando un novo pulo a esta sección e ofrecéndolle ao público de Cans unha mostra de pezas cheas de procura estética e con xeitos de narrar afastados do convencional. Estas curtas completan ademais a panorámica do cinema galego que o Festival ofrece, complementando a variedade da ficción con filmes que exploran o etnográfico, a autobiografía ou as temáticas sociais. Dúas das nove pezas (Marxes e Tiempo) son estreas absolutas, e Forest e Americano terán en Cans a súa estrea en España e Galicia respectivamente.