O FESTIVAL DE CANS E CARLIN ENTREGAN CHEQUES DESCONTO ÁS NENAS E NENOS DA ALDEA

O Festival de Cans entregou nestes días os cheques desconto para que as rapazas e rapaces da aldea que colaboran co certame, poidan canxealos por material escolar neste inicio do curso. Esta entrega é froito dunha colaboración que o festival asinou coa cadea de papelería Carlin, unha das firmas colaboradoras do certame.

En total, foron ata 24 rapazas e rapaces desde 8 a 18 anos, os que recibiron un cheque de desconto para mercar material escolar e de apoio didáctico por un valor de vinte euros.

Todas estas rapazas e rapaces colaboran co Festival de Cans, nun intento desde o certame de ir formando edición tras edición a este grupo de xóvenes que están chamados a asegurar o futuro organizativo do festival.

En cada edición, desde a organización convídase a participar a todas as nenas e nenos da aldea  que cumpriran 8 anos e queiran formar parte do festival. Todas e todos eles asisten a reunións previas coas súas nais e pais, onde se lles explican as cuestións xerais do festival, os aspectos básicos das diferentes tarefas a realizar e nocións que o festival se preocupa en inculcar como a igualdade, o respecto ó medio ambiente e a solidariedade entre compañeiras e compañeiros.

O primeiro chanzo no que colaboran na estrutura do festival é o de “guías de camiños”, orientando ó público no acceso ós diversos jalpóns ou sinalando as direccións dos diversos espazos de actividades, así como os lugares de arranque dos chimpíns. Cos seus característicos chaleques reflectantes, os guías dos camiños, desenvolven esta función ata os 15 anos, idade na que pasan a desenvolver outros cometidos dentro da estructura organizativa.

Cada ano van rotando por diversos departamentos como os jalpóns de proxeccións, as zonas de produción musical ou as de actividades, de xeito que pouco a pouco vaian tendo unha perspectiva completa do festival para, nun futuro cercano, incorporarse no núcleo permanente da organización do festival.

A entrega destes cheques de desconto en material escolar enmárcase dentro da idea da organización do Festival de Cans, onde a premisa é que calquera aportación que poida facer o certame redunde en aspectos como a educación e a cultura, sobre todo enfocado ós máis novos.

A entrega efectuouse no Torreiro de Cans, onde estivo presente Rosa Bernárdez, coordinadora das nenas e nenos do festival, así como os membros da organización Isaac Campos e Abel Gallego.

O xurado de videoclips premia “Vision”, dirixido por Peque Varela para Window Pane

A Praza do Concello acolleu onte a celebración da Noite LASAL co concurso de videoclips no que se proxectaron dezanove pezas e no que se puido ver unha mostra das propostas musicais e audiovisuais galegas máis recentes. Continúe lendo O xurado de videoclips premia “Vision”, dirixido por Peque Varela para Window Pane

‘Eroski Paraíso’ e ‘Global Player’, proxeccións estrela do segundo día de Cans

Mañá xoves, o Festival de Cans acolle como filme de apertura a pre-estrea de Eroski Paraíso e a proxección de Global Player, a película que completa a primeira retrospectiva internacional do certame dedicada ao director alemán Hannes Stöhr. Continúe lendo ‘Eroski Paraíso’ e ‘Global Player’, proxeccións estrela do segundo día de Cans

Curtametraxes finalistas – Proxecto contra a violencia de xénero “Xénero/Historias”

Curtametraxes finalistas – Proxecto contra a violencia de xénero “Xénero/Historias”

Venres 24 | 17h30 | Baixo de Carlos | Entrada libre

Máis de 250 estudantes da ESO dos catro institutos do Porriño traballaron e realizaron ao longo do curso escolar arredor dunha ducia de curtametraxes que poñen o foco de atención e queren facer pensar sobre o problema da violencia de xénero. O traballo destas rapazas e rapaces, de entre 13 e 15 anos, estivo coordinado polo pedagogo Rubén Barciela e foi posible grazas ao realizador Xosé David Gamallo e a pedagoga Cristina Míguez. O resultado final destas 11 curtametraxes terá a súa estrea absoluta o venres 23 ás 18h00 no Festival de Cans.

Proxecto impulsado polo Concello do Porriño, creado pola empresa educativa Koremi e apoiado polo Festival de Cans. Participan o IES Pino Manso, IES Ribera do Louro, CPR Santo Tomás e o CPR Irmáns Quiroga.

Curtas:
Ojos cerrados (3º ESO, IES Pino Manso)
Basta ya! (3º ESO, IES Pino Manso)
Una mirada atrás (3º ESO, IES Pino Manso)
El origen (4º ESO, IES Pino Manso)
Acoso (4º ESO, IES Pino Manso)
Engaño (4º ESO, IES Pino Manso)
La nevera (3º ESO, IES Ribera do Louro)
Play-Pause (3º ESO, IES Ribera do Louro)
No soy así (2º ESO, CPR Irmáns Quiroga)
Pesadilla (3º ESO, CPR Irmáns Quiroga)
No estoy sola (2º ESO, CPR Santo Tomás)

Actuacións hip-hop – Proxecto contra a violencia de xénero “Xénero/Versos”
Venres 24 | 19h30 | Parque do Río

Como peche final das proxeccións de curtametraxes realizadas no marco do proxecto “Xénero/Historias” celebrárase ás 20h00 no Parque do Río unha festa na que se presentarán as cancións de hip-hop contra a violencia machista compostas dentro do obradoiro “Historia/Versos” polo alumnado da ESO dos catro institutos participantes. Nesta actuación poderanse escoitar un total de seis cancións, das cales algunha serve como banda sonora das curtametraxes realizadas neste proxecto, e que serán editadas co apoio da Fundación SGAE.

OBRADOIRO DE CINE “DA IMAXINACIÓN Á PANTALLA – PARTICIPA MÉLIÈS”

OBRADOIRO DE CINE “DA IMAXINACIÓN Á PANTALLA – PARTICIPA MÉLIÈS”

Venres 24 | 17h00 | Cuberto de Chelo  
Venres 24 | 19h30 | Proxección dos traballos finais

Despois do éxito desta actividade o ano pasado, o Festival de Cans e a Obra Social La Caixa repiten este obradoiro impulsado polo proxecto Participa Méliès. A través da imaxinación e das creacións de George Méliès, un dos pioneiros do cinema, este taller iniciará a rapaces e rapazas na linguaxe e no proceso cinematográfico. Cada equipo coa axuda dunha tablet terá que realizar unha curtametraxe fantástica mediante exercicios prácticos nos que traballarán a idea do guión, pasando pola gravación (empregando efectos especiais sinxelos) ata finalmente a edición. Os traballos poderán verse ás 19h30 no Cuberto de Chelo e poderán participar no concurso Participa Méliès, unha iniciativa da Obra Social La Caixa. O taller estará coordinado polo realizador e educador Alexis Borrás, que ten traballado con directores do talento de Juanma Bajo Ulloa ou Borja Cobeaga e é e profesor da Universitat Autònoma de Barcelona.

Cre-accións. Obradoiro creativo de stop-motion

Cre-accións. Obradoiro creativo de stop-motion

Imparte: Ramiro Rodríguez dos Santos
Sábado 25 | 11h00 – 13h00 | Inquedanzas
Máximo: 15 crianzas de entre 4 a 12 anos
Prezo: 3€

Toda historia componse de milleiros de pequenos intres e soños. Pero as historias non deben gardarse no maxín máis que un tempo. O momento da súa representación agarda impaciente. A través da imaxinación e a improvisación e coa axuda de Ramiro Rodríguez dos Santos, as nenas e nenos confeccionarán neste obradoiro un guión que logo farán realidade coa técnica do stop-motion. Será a maneira de compartir e realizar coas mans as fantasías e soños de cada un para crear unha grande historia común.

Obradoiro Son-Cinema

Son-Cinema [con Juanma LoDo]

Sábado 25 | 16h30 | Cuberto de Pato 
Prezo: 3€

Esta actividade está centrada nas bandas sonoras dos filmes e nas diferentes emocións que a música e o son en relación coas imaxes poden provocar no espectador. Este taller parte de fragmentos de importantes películas da historia do cine realizadas por directores como Alfred Hitchcock, Lev Kulechov e Serguéi Eisenstein. A partir destas obras, e empregando instrumentos como sintetizadores e obxectos do cotián, o artista Juanma Lodo creará un xogo sorprendente e participativo no que as nenas e nenos poderán comprobar como a música pode facer cambiar e variar a percepción das imaxes.

Exposicións

Exposición fotográfica “Outra pel, outro rostro” de Cris Andina

Aberta dende o 15 de maio ata o próximo 15 de xuño
Dous espazos | Círculo Recreativo Cultural: Todos os días dende as 10 da mañá.
Sala Ingrávida | De domingo a mércores: 18h a 21h30 | De xoves a sábado: 19h a 23h Entrada gratuíta.

No intento continúo de abrirse a outras disciplinas, o Festival de Cans programa por primeira vez nas datas do certame unha exposición fotográfica. Ao longo de varios meses, a fotógrafa Cris Andina seguiu a numerosas actrices e actores de teatro para retratalos no intre no que pasan a barreira da caracterización e mudan de rostro para interpretar aos seus personaxes no escenario. A mostra, que leva por título Outra pel, outro rostro, pretende ser unha homenaxe ao oficio do teatro, onde estes profesionais fan uso dun talento espido e afrontan o reto desta arte, na que adoita primar o espazo figurado fronte á propia personaxe. De aí a escolla da fotógrafa de realizar os retratos en branco e negro e sen artificios. Nos máis de 30 retratos que compoñen a exposición, e que estarán repartidos en dous espazos, poderemos ver caras habituais como Miguel de Lira e a compañía Chévere, Melania Cruz, Javier Gutiérrez, Xosé A. Touriñán, María Vázquez, Serxio Pazos ou a Areta Bolado, Noelia Castro e Alién Kendelman da compañía teatral A Panadaría.

Cris Andina (Ribadeo, 1978) é unha fotógrafa que traballa no eido cultural e en ámbitos como o cine, a música e as artes escénicas, desenvolve a súa labor facendo fotografía de eventos e actuacións en directo, entre eles, o Festival de Cans.

Proxecto Senta

Sábado 25 | Todo o día | Diferentes espazos de Cans

Dende hai varias edicións o Festival de Cans colabora coa Escola Técnica Superior de Arquitectura da Universidade da Coruña para reflexionar sobre a redefinición da paisaxe da aldea e pon a atención sobre espazos e lugares especiais que, aínda que sexan invisibles a priori, gardan gran potencial na paisaxe física e emocional de Cans. Neste sentido ten desenvolvido actividades para visibilizar o espazo no Parque do Río, ten descuberto vellos carreiros e atallos que vertebran a aldea ou realizado unha reflexión sobre a masificación do festival (e dos festivais en xeral). Nesta edición, o festival volve traballar man a man coa ETSAC poñendo en marcha o Proxecto Senta. Esta iniciativa, realizada polas alumnas e alumnos da UDC coordinados polo prestixioso profesor e arquitecto Juan Creus –do estudio CreuseCarrasco–, traballará na recuperación dos bancos exteriores e currunchos onde a xente se sentaba a descansar ou a ver e contemplar a vida, unha relación que non dista moito de ollar para a pantalla de cine. Deste xeito, estes lugares destinados ao descanso, tomarán vida de novo durante os días do Festival de Cans.

Exposición retrospectiva de Luis Davila “O Bichero”

Venres 24 | Toda a tade | Cans Voulevar

Luís Davila é un dos debuxantes máis populares do país que arrinca sorrisos diarios coas tiras “O Bichero” que publica no xornal Faro de Vigo e que rapidamente inundan as redes sociais ao ser compartidas por miles de persoas conquistadas polo seu humor. Como en anteriores edicións, este ano tamén poderemos gozar con unha exposición composta por unha selección das súas viñetas máis cinematográficas e de algunhas, que en varias ocasións tamén teñen retratado o Festival de Cans.

Costa Azul

Sábado 25 | Todo o día | Costa de subida ao Cuberto de Chelo

Ao longo de cada edición as nosas veciñas do Barrio da Pedreira, Marta García e Paula Romero, recompilan en forma de fotografías, novas de xornais, cartaces ou camisolas, o máis destacado de cada edición. O seu traballo exponse nesta costa de subida ao Cuberto de Chelo revestida de cor azul cuxo nome evoca ao outro Cannes: a Costa Azul.

Concurso de pintura “Pintar o Cine”

Xoves 23 | 15h – 20h | Praza do Concello

O xoves terá lugar o concurso de pintura rápida “Pintar o cine”, actividade que substitúe a Can Parade. Un total de doce artistas terán que realizar en cinco horas unha obra de temática e técnica libre que inclúa a silueta do can de Cans nunha escena de inspiración cinematográfica. Serán quen de conseguilo?

Cans Senior

Mércores 22 | 10h00 | Centro de día de Torneiros

Esta iniciativa pretende ata medio centro de centros de día de toda Galicia se impliquen na reinterpretación artística de diferentes secuencias da historia do cinema. O mércores 22 de maio inaugúrase no Centro de Día de Torneiros a exposición dos traballos finalistas. Unha oportunidade emocionante na que poder ver as súas creacións e descubrir o alto grao de coñecemento que teñen os nosos maiores do Festival de Cans.

Cans do Futuro

Cans do Futuro

Mércores 22, xoves 23 e venres 24 | 12h00 | Baixo de Bugarín

Os centros educativos de toda Galicia organizan visitas extraescolares durante as mañás do mércores, xoves e venres da semana do Festival de Cans. Como en anos anteriores, as alumnas e alumnos de institutos e escolas terán a posibilidade de encontrarse con cineastas e profesionais que traballan do eido audiovisual nunha sección realizada en colaboración coa Academia Galega do Audiovisual que chamamos “Oficios invisibles” e na que nos acompañarán Alicia Saturna (vestiario e atrezzo); Lucía Catoira Pan (directora de fotografía) e Diana Toucedo (directora e montadora). Cada centro educativo estará na aldea durante unha mañá enteira, asistindo a unha hora e media de proxección e a estes encontros a outra hora e media de visita guiada pola aldea. No tempo de descanso, tamén poderán facer a clásica foto de recordo: enriba do chimpín que se aparca xunto ao Can de Pedra.

Roteiros

Roteiros cinéfilo-literarios con Carlos Meixide e Xosé Antonio Perozo

Mércores 22 e xoves 23 | 11h30 e 12h00| Saída da rotonda do Can e camiños da aldea (Meixide)
Xoves 23 | 10h30 | Saída da rotonda do Can e camiños da aldea (Perozo)

Os escritores Carlos Meixide e Xosé Antonio Perozo guiarán aos asistentes por uns roteiros cinéfilo-literarios baseados nas súas obras. Meixide ofrecerá a súa mirada particular a través dos puntos polos que os protagonistas de Cans, a súa novela xuvenil, viven as súas particulares aventuras. Todo mesturado con unha chea de referencias cinéfilas coas que gozan as nenas e nenos que leron o libro. Por súa parte, Xosé Antonio Perozo realizará un roteiro inspirado na súa novela A grande epopea do pianista de Cans, un libro que se presentará no festival. A obra nace dun relato fantástico que o autor publicou no Faro de Vigo sobre a coñecida Pedra de Beethoven ou Pianista de Cans, e que agora volveu recoller para contar a historia de Pedro de Chamorro, o pianista que unha noite quedou petrificado para sempre mentres daba un concerto baixo as estrelas.

CanSonoro. Roteiro da música e do patrimonio con Xurxo Souto

Sábado 25 | 10h00 | Saída da rotonda do Can

Dende fai unhas cantas edicións, Xurxo Souto, escritor e cantante dos Diplomáticos de Monte Alto, guía un roteiro polos camiños e corredoiras de Cans que se inspira nas historias das veciñas e veciños e na tradición musical de cada casa de Cans. Nesta ocasión, o roteiro discorrera por lugares emblemáticos do noso patrimonio como o muíño do Froxán (que se abrirá para a ocasión) ou Penedo de Cubaladra coa súa enigmática inscrición de 1869 que cumpre agora 150 anos. Esta ruta faina acompañado dos acordeonistas de Acordecans que amenizan o camiño mentres Xurxo Souto conta historias, canta e fala co público e intercala diálogos de filmes no seu discurso. Este roteiro que rendirá unha homenaxe especial ao grupo Catro Ventos de Cans.

Este roteiro será accesible a cadeiras de rodas e a carriños de bebé.

Final do concurso “Ollo de vidro”

Final do concurso “Ollo de vidro”

Mércores 22 | 18h30 | Baixo de Bugarín

O Festival de Cans impulsa o concurso “Ollo de vidro”, dentro do marco da iniciativa da canle de Youtube Recoméndoche un libro. Una iniciativa que ten como obxectivo fomentar entre a cidadanía hábitos lectores, utilizando a lectura como fonte de información, aprendizaxe e enriquecemento persoal, ao mesmo tempo que se promove o uso do galego como vehículo de comunicación nas redes sociais.

Na final do concurso “Ollo de vidro” proxectaránse un total de 14 traballos finalistas, que terá lugar o mércores 22 de maio ás 18h30 no Baixo de Bugarín nunha gran final na que se desvelarán os gañadores. Entre estes traballos poderánse ver desde críticas literarias, booktrailers, recomendacións ou outro tipo de pezas audiovisuais máis creativas dirixidas á animación lectora.

Neste encontro contaremos coa presenza dos finalistas, do xurado avaliador e das institucións que apoian o proxecto realizado polos Equipos de Dinamización Lingüística da Escola Oficial de Idiomas de Vigo, do IES Castelao, IES Pino Manso de O Porriño, a Biblioteca Pública Municipal Xosé Neira Vilas de Vigo, o Festival de Cans, a Asociación de Veciños do Calvario e da Biblioteca Municipal de O Porriño.

LISTADO DE FINALISTAS:

Hotel para coleccionistas discretos, de Antón Veiga
Los juegos del hambre, de Andrea, Emma e Antía
Futbolísimo 4, de Xabier Arias
Made in Galiza, de Ana Fernández
Literatura de terror, de Sergio
La profecía del cuervo, de Lia Lago
Saga Percy Jackson , de Martín, Noa e Belén
Espertando, do CEIP Belesar de Baiona
O xardineiro dos ingleses, de Aarón Vilariño e Artur Vázquez
Camiños ganduxados O libro do desarraigamento, de J.M.García Plazuelo
A casa do paralelo 54, de Luz Beloso
Buenos días, Princesa!, de Arianna e Jennifer
El libro del cementerio, de Ainhoa e Carlos
Ahora que ya bailas de Li, Valeria, Manuela e Lorena

Neste enlace podedes ver os vídeos seleccionados: https://www.youtube.com/playlist?list=PLcdSrOtmLTQ_Ktc1I9ZxTApIjQllFBhYy

LendoCine

LENDOCINE

Xoves 23 | 18h00 | Tienda Tía Tata

No seu intento por explorar a estreita vía entre o cine e a escrita, o Festival de Cans pon en marcha na súa XVI edición a actividade LendoCine, un espazo no que se darán a coñecer libros recentemente publicados nos que o cine é o trasfondo ou o protagonista principal. As autoras e autores presentarán neste encontro os seus traballos, ofrecendo así unha panorámica ampla do que se está editando sobre cine dentro e fóra de Galicia. En LendoCine atoparemos dende publicacións de traballos de investigación, obras adaptadas ao cine, novelas de pouso cinematográfico ou libros que recollen as memorias de profesionais da interpretación (entre outros).

Filmoterapia. 100 películas inspiradoras, de Jaime Burque (El Hilo Ediciones, 2018)

Quen non quedou marcado por un filme que lle axudou a cambiar a súa perspectiva de vida? O psicólogo e escritor Jaime Burque indaga neste libro sobre a idea filmoterapéutica do cine a través dunha viaxe por 100 películas para demostrar como o sétimo arte é quen de conectarnos cos nosos sentimentos máis profundos. Coa presenza do autor Jaime Burque.

Taller de la Memoria, VV.AA. (Fundación AISGE)

A colección de libros Taller de la Memoria da Fundación AISGE naceu co propósito de recoller a memoria e as vivencias de actrices e actores veteranos co fin de salvagardar a riqueza das súas testemuñas e da súa profesión. En Galicia AISGE publicou as memorias de históricos da interpretación como Vicente Montoto, Pilar Pereira ou Manuel Lourenzo. Tamén editou as memorias de actrices e actores que xa non está con nós, como é o caso de Doretea Bárcena e Xan Cejudo. Coa presenza de Isabel Blanco, actriz e delegada da Fundación AISGE en Galicia.

A grande epopea do pianista de Cans,  de Xosé A. Perozo (Auga Edicións, 2019)

Hai anos, cando aínda non nacera o Festival de Cans, o escritor Xosé A. Perozo publicou no Faro de Vigo un relato arredor da coñecida Pedra de Beethoven ou Pianista de Cans. Máis tarde, a partir do proxecto Miradas de Cans e as residencias promovidas polo noso festival, Perozo volveu retomar este relato fantástico, readaptándoo para contar a historia de Pedro de Chamorro, o pianista que quedou petrificado para sempre mentres daba un concerto baixo as estrelas. Unha historia que está chamando por unha adaptación ao cine. Coa presenza do editor e autor Xosé A. Perozo.

Accesible Filmaking, de Pablo Romero–Fresco (Editorial Routledge, 2019)

Este libro parte dunha interesante investigación (que fascinou ao mesmo Ken Loach) sobre a análise e o estudo do subtitulado para facer o cine máis accesible ao público. O profesor e realizador Pablo Romero-Fresco chegou á conclusión de que as películas sería mellor comprendidas se os produtores, guionistas e realizadores traballaran no subtitulado dende a orixe do filme, e non ao rematar todo o proceso.Coa presenza do autor, investigador e realizador Pablo Romero-Fresco.

Eroski Paríso, do Grupo Chévere (Kalandraka, 2018)

A compañía teatral Chévere, Premio Nacional de Teatro no ano 2014, fixo deste texto o seu último gran éxito co que triunfaron en escenarios nacionais e internacionais. Poderíase dicir que este libro é literatura da boa, unha obra que pode lerse como obra de teatro e como guión de cine. Tanto é así que o realizador Jorge Coira acabou por converter Eroski Paraíso en película. A súa pre-estrea será no Festival de Cans. Coa presenza de Patricia de Lorenzo, Miguel de Lira e Xesús Ron, membros do Grupo Chévere.

Hotel para coleccionistas discretos, de Diego Giráldez (Galaxia, 2019)

O autor porriñés Diego Giráldez estará en LendoCine para falarnos do seu segundo libro Hotel para coleccionistas discretos. Un relato orixinal cargado de chiscadelas cinematográficas con referencias directas a La Escopeta Nacional de Berlanga, unha evidente inspiración no cine de Wes Anderson e reminiscencias que recordan as historias de Jacques Tati. A literatura non é cine, pero ás veces aínda se lle parece. Coa presenza do autor Diego Giráldez.

Actrices secundarias, de Clara do Roxo (Editorial Elvira, 2019)
Claro do Roxo naceu en Caracas e é filla de emigrantes galegos. Esta novela ten como fondo a emigración a América de miles e miles de persoas, que como os país de Clara, marcharon e formaron alá unha familia pero que sempre pensaron en volver. Máis concretamente Actrices secundarias conta a historia de catro mulleres que asumiron o seu papel secundario nas súas vidas, un chanzo por debaixo do lugar que ocupaban os seus maridos. Esta novela foi finalista do Premio Torrente Ballester 2018. Coa presenza da autora Clara do Roxo

Cine e gastronomía

Showcooking Tapas de cine – Estrella Galicia

Xoves 23 | 20h30 | Praza do Concello

A gastronomía volve ao Festival de Cans a través da colaboración con Estrella Galicia, que nos traerá ao cociñeiro Pablo Pizarro, do restaurante coruñés Bocanegra, para que elabore en directo 150 tapas. Será o xoves 23 de maio na Praza do Concello.

Kike Piñeiro

Outra parte gastronómica do programa virá da man do cociñeiro Kike Piñeiro, que estará a cargo da cociña para as persoas convidadas do Festival de Cans. Piñeiro é o chef do restaurante compostelano A Horta d’Obradoiro, un espazo caracterizado por unha sutil renovación da cociña e o emprego de produtos tradicionais, como sempre, produtos Galicia Calidade.

 

Proxecto Cans 303

Proxecto Cans 303

Mércores 22 | 21h00 | Torreiro de Cans
Presentación do proxecto “Cans 303” feito polas alumnas e alumnos do curso.
Estrea do documental Os Catro Ventos de Cans. A memoria da música.

O Proxecto Cans303 naceu con dous obxectivos moi marcados. Por un lado, rescatar a memoria dos habitantes e da aldea de Cans e, por outro, co fin de que as mesmas veciñas e veciños se implicarán na tarefa de creación dunha peza audiovisual. O proxecto “Cans 303” mobiliza en cada edición a un grupo de dez persoas de entre 12 e 60 anos para facer e desenvolver unha proposta dende o inicio e pasando por todas as súas fases. Nesta edición, o equipo de alumnas e alumnos coordinados por Juanma Lodo, reconstruirá a historia da agrupación musical Os Catro Ventos.

Os Catro Ventos de Cans. A memoria da música

 
Dirección: Juanma LoDo

Participantes: Alba Sobrino Maceira, Ángel Rodríguez Martínez, Ainhoa Cabaleiro Boente, Raúl Maceira López, Flora Maceira Casalmorto, Rosa Bernárdez Quintas, Carlos Rodriguez e Pablo González Blanco.

Vai de: Ao longo de catro meses o obradoiro de Cans 303 traballou no rescate da memoria do grupo histórico Os Catro Ventos, que amenizou as festas do sur da provincia de Pontevedra ao longo de dúas décadas. A partir da recuperación dunha vella cinta de cassette e dunhas gravacións audiovisuais antigas o equipo do proxecto Cans 303 reconstruíu a memoria desta formación, que entre as súas singularidades, tiña entre os seus compoñentes á acordeonista Marisol e ao batería Rafa, os dous fillos de Pepe “O bombeiro”, fundador do grupo.

Quince primaveras

Quince primaveras

Venres 24 | 22h30 | Torreiro de Cans | [Estrea mundial]

Quince primaveras é o título do documental feito pola realizadora Isaura Docampo sobre a edición do Festival de Cans de 2018. A estrea deste documental será o venres 24 de maio durante a noite das homenaxes, alí poderemos recordar e celebrar os momentos que vivimos fai un ano.

FADE INTO NOTHING

FADE INTO NOTHING

2018 | 70’ | inglés (con subtítulos ao portugués) | [Estrea en España]
Venres 24 | 18h30 | Baixo de Bugarín

Dirección: Pedro Maia

Guión: Paulo Furtado, Pedro Maia e Rita Lino

Produción: Bando à Parte (Rodrigo Areias)

Fotografía: Rita Lino

Música orixinal: Paulo Furtado (The Legendary Tigerman)

Elenco: Paulo Furtado, Mayumi Pereira e Rita Lino

Vai de: Un road-trip en forma de falso diario sobre a viaxe dun home que, máis que desaparecer, pretende non ser nada, procura converterse en nada. 

O detalle: Cans acollerá a estrea en España desta película gravada no deserto de California. Fade into nothing pasou polo Indie Lisboa en 2017.

* Debido á coincidencia horaria da película “Fade into nothing” co reparto de pulseiras de acceso ao concerto de Marlango, ás persoas que asistan como espectadores a esta proxección, entregaráselle ao final da película unha pulseira por persoa para acceder ao concerto. 

Unha vez comece o filme non se deixará pasar a ninguen á sala (aforo máximo da sala: 130 persoas).
 
 

COLOQUIO NA LEIRA CON RODRIGO SOROGOYEN

COLOQUIO NA LEIRA CON RODRIGO SOROGOYEN

Sábado 25 | 12h00 | Espazo Estrella Galicia na Leira de Alicia

Rodrigo Sorogoyen (Madrid, 1981) é un dos directores españois máis importantes do momento. Dende a estrea de Que Dios nos perdone en 2016, é dicir, hai tan só tres anos, o seu nome comezou a facerse máis e máis popular. O despegue da súa carreira confirmouse este último ano coa nominación ao Oscar pola curtametraxe Madre -protagonizada pola actriz Marta Nieto – e o éxito da súa nova película El reino, gran triunfadora nos últimos Goya. A súa obra conxuga a orixinalidade e a inventiva propias do cine de autor co talento para o cine de xénero, conseguindo integrar no thriller temas de gran impacto social como a corrupción ou a crise económica, a miúdo a través de personaxes complexos que se enfrontan a situacións límite.

Aínda que Rodrigo Sorogoyen comezou a traballar como director e guionista de ficción en coñecidas series de televisión como Impares, La Pecera de Eva ou Frágiles, pronto daría o salto ao cinema. En 2008 debutaba coa comedia romántica 8 citas xunto ao realizador Peris Romano, un preludio ao seu primeiro gran recoñecemento, que non chegaría ata 2013. Ese ano estrea Stockholm, unha película auto-producida e financiada con crowdfunding, que gañou tres Biznagas de Prata no Festival de Cine de Málaga (entre eles o premio á mellor dirección e ao mellor guión novel realizado xunto a Isabel Peña). Logo chegou Que Dios nos perdone, xa cun maior presuposto e confirmando as expectativas: este thriller policíaco no que o contexto social da crise económica se deixaba ver de fondo destacou polas interpretacións de Roberto Álamo ou Antonio de la Torre e foi premiado en San Sebastián. A partir deste punto, o seu nome comezaría a ser coñecido internacionalmente con Madre, unha peza que acumula máis de cen premios, entre eles, o Goya á Mellor curtametraxe de ficción en 2018 a nominación aos Oscar en 2019 na mesma categoría. En xaneiro deste ano estreou El reino, o seu último filme ata o momento. Esta película, que trata sobre a corrupción en España, arrasou nos premios Feroz e nos Goya, levando os galardóns á Mellor dirección, ao Mellor guión orixinal e ao Mellor actor de reparto, para o galego Luis Zahera.

EROSKI PARAÍSO

EROSKI PARAÍSO

2019 | 75’ | Galego, castelán
Xoves 23 | 20h00 | Centro Recreativo e Cultural do Porriño

Dirección: Jorge Coira e Xesús Ron

Guión: Chévere

Produción: Chévere e OlloVivo

Elenco: Miguel de Lira, Patricia de Lorenzo, Cristina Iglesias, Luis Martínez e Fidel Vázquez

Montaxe: Lucía Iglesias e Jorge Coira

Son: Juan Gay

Postprodución de imaxe: Alfonsin Digital Lab

Postprodución de son: Soundtroop

Dirección de arte: Antonio Pereira e Chévere

Dirección de produción: Gaspar Broullón e Patricia de Lorenzo

Vai de: Alejandra regresa a Muros para rodar o seu proxecto final da escola de cine. Leva tempo querendo facer un documental que conte a historia dos seus pais, como se coñeceron na sala de festas Paraíso e como unha noite mudou para sempre as súas vidas. Pero Eva e Antonio levan anos separados, a vella discoteca é hoxe un supermercado Eroski e os recordos nunca espertan como os imaxinas. Con todo, esta é a súa película.

O detalle: Adaptación cinematográfica da obra teatral do mesmo título realizada por Chévere. Esta compañía recibiu no ano 2014 o Premio Nacional de Teatro.

CAFÉ CON CREA: COLOQUIO HANNES STÖHR

CAFÉ CON CREA: COLOQUIO HANNES STÖHR

Venres 24 | 10h00 | Baixo de Moncho

O Festival de Cans acolle, como cada ano, un encontro en colaboración con CREA, a Asociación Galega de Profesionais da Dirección e da Realización. Nesta ocasión contará coa presenza do director alemán Hannes Stöhr, a quen se lle dedica a primeira retrospectiva internacional da historia do Festival de Cans. Este cineasta nacido en Stuttgart, onde exerce actualmente de profesor de dirección e guión, formouse na Deutsche Film- und Fernsehakademie de Berlín. Sendo estudante viaxou por toda Europa. Chegou a Galicia, concretamente a Santiago de Compostela, arredor dos anos noventa, e coincidiu coa eclosión da Sala Nasa e todo o movemento que se creou arredor dela. Aquí establecería contacto e amizade con actrices e actores como Miguel de Lira, Luís Tosar e Blanca Cendán (entre outros moitos). Un conxunto de intérpretes que formarían parte do elenco de One Day in Europe, aquí traducida e coñecida como Galatasaray-Dépor (2005).

Hannes Stöhr participa neste Café con CREA onde debullará sobre o oficio de dirixir cine acompañado polo director Fon Cortizo, membro da directiva da asociación, e polo realizador Jorge Coira, amigo e colega de profesión.  Neste encontro falará ademais sobre as catro películas que dirixiu ata o momento –unha filmografía que poderemos ver ao completo dentro da programación do festival- e tamén terá oco para adiantar parte do guión da súa próxima longametraxe, na que retoma a conexión Galicia-Alemaña. Este coloquio terá lugar no Baixo de Moncho o venres 23 de maio, e as persoas asistentes serán convidadas a un café pola nova marca colaboradora do festival, Cafés Dromedario.

MASTERCLASS SOBRE SUBTITULADO CON PABLO ROMERO_FRESCO

MasterClass sobre subtitulado e accesibilidade

Mércores 22 | 10h30 | Baixo de Moncho
 

O docente e realizador Pablo Romero-Fresco ofrecerá unha masterclass na que falará dos procesos de subtitulado desde dúas vías. Por un lado, analizará a importancia que teñen estes para os públicos con dificultades de accesibilidade (visión e audición) para a comprensión plena dos filmes. Por outro, poñerá no foco de atención na oportunidade de proxección das linguas minorizadas a partir dun subtitulado correcto. Un debate de actualidade, despois da polémica que suscitou a mala tradución dos subtítulos da película Roma, de Alfonso Cuarón, onde non se respectou as variantes lingüísticas do español de México. Pablo Romero-Fresco falará do positivo que sería aplicar estas investigacións á industria de subtitulado en Galicia e España, onde estes procesos están pouco desenvolvidos.

GLOBAL PLAYER

GLOBAL PLAYER

2013 | 98 minutos | alemán (con subtítulos ao español)
Xoves 23 | 17h00 |Círculo Recreativo e Cultural do Porriño |
[Estrea en Galicia]


Dirección e guión: Hannes Stöhr

Produción: Sabotage Films GmbH, Stoehrfilm, ARD Degeto Film, Bayerischer Rundfunk e ARTE.

Fotografía: Andreas Doub

Música: Florian Appl

Montaxe: Simone Klier

Elenco: Christoph Bach, Walter Schultheiß, Inka Friedrich, Ulrike Folkerts, Stefan Hallmayer, Monika Anna Wojtyllo, Rita Lengyel, Harvey Friedman, Hans-Jochen Wagner, Henriette Müller e Berthold Biesinger.

Vai de: A empresa familiar Bogenschuetz & Sons fabricou durante xeracións máquinas de textil nunha pequena cidade do sur de Alemaña. Pero hoxe en día a demanda baixou pola competencia asiática. Michael Bogenschuetz vese forzado a negociar unha venda cos chinos ás agachadas do seu pai.

Xénero: Comedia dramática. Familia.

Detalle: Esta película poderase ver por primeira vez en Galicia logo de pasar polo Festival Internacional de Cinema Jove de Valencia un ano despois da súa estrea. Non chegou a estrearse nas salas de cine españolas e terá no Festival de Cans a súa estrea en Galicia.

PAKOLAS CON DEBUXOS DE LAURA ROMERO

CORES, CONTOS E ROCK’N’ROLL 

Actuación musical de Pakolas + debuxos en directo de Laura Romero 
Sábado 25 | 13h30 | Parque do Río

Cores, contos e rock’n’roll é un espectáculo para todos os sentidos no que se combina música, a narración e os debuxos da man da ilustradora Laura Romero. Paco Cerdeira (Pakolas), músico e artista que formou parte de grupos infantís como Mamá Cabra ou de proxectos como A Gramola Gominola, conducirá as nenas e nenos coa súa voz e a súa guitarra por un universo fantástico repleto de historias de animais con moralexa final. A man de Laura Romero daralle vida aos personaxes de Pakolas, realizando ilustracións en directo e poñendolle cara e cores a estas historias. Pakolas preparou para o Festival de Cans un animado concerto onde coñeceremos a ‘Baldomero o mero’ ou ao ‘Xabarín con bombín’ e onde estará moi presente o cine. Atención rapazada porque o sábado ao mediodía teremos moito baile no Parque do Río. Esta actuación conta co apoio da Secretaría Xeral de Política Lingüística da Xunta de Galicia.

CONCERTO SU GARRIDO

CONCIERTO DE SU GARRIDO POMBO

Sábado 25 | 17h30 | Parque do Río [Para todos os públicos]

A música de Su Garrido Pombo está influenciada polo jazz, o folk ou a bossa nova. Na actuación, que ofrecerá en Cans a tarde do sábado no Parque do Río, presenta o seu primeiro disco en solitario Quedo a vivir aquí. Un traballo no que fusiona estilos, con cancións sinxelas pero potentes realizados só con voz e guitarra, e no que nos mostra letras realizadas a partir de poemas de Xohana Torres ou Ana Romaní con outras cancións tradicionais que lle ensinou a súa avoa na aldea de Traspielas, en Fornelos de Montes. Su Garrido Pombo forma parte do proxecto musical Son Trío, finalista dos Premios Martín Codax na categoría de música clásica contemporánea, e foi a gañadora da última edición dos Premios Fran Pérez “Narf”, que organiza a Deputación da Coruña, entidade que está apoiando e promovendo as súas actuacións en destacados festival de Galicia.

CONCERTO PSYCHOTROPIC BOOM

CONCERTO PSYCHOTROPIC BOOM

Sábado 25 | 19h30 | Parque do Río [Para todos os públicos]

Esta inclasificable formación, caracterizada por ter unha sólida base de instrumentos de vento, chega dende a veciña aldea de Xinzo (Ponteareas), co apoio do Centro Cultural do lugar. A música desta banda parece por momentos traída dos Balcans, e outras, unha banda saída do máis profundo de Nova Orleans. Psychotropic Boom ofrecerannos un repertorio divertido, no que non van faltar clásicos musicais de película, para gozar en familia do fin dunha xornada chea de actividades.

SYD. EFECTOS ESPECIALES QUE DEJAN DE SER ESPECIALES CON EL TIEMPO

SYD. EFECTOS ESPECIALES QUE DEJAN DE SER ESPECIALES CON EL TIEMPO

2019 | 65’ | castelán | [Estrea mundial]

Dirección, guión e montaxe: Fernando Epelde

Fotografía: Pablo Zapata

Son: Nacho Abad

Dirección de arte: Aïda Gómez

Música: Fernando Epelde

Elenco: Miguel Insua, Marta Pazos, Hugo Torres, Daniel Méndez, Alberto Basas, Isabel Dimas, Fernando Epelde, Aïda Gómez.

Vai de: Isidoro Medró, coñecido como Syd, foi un importante director de efectos especiais e creou ao mítico extraterrestre da película Vecino. Agora, a súa produtora encargoulle a súa filla Sofía unha reedición do filme con novos efectos dixitais. SYD é unha película sobre dúas xeracións, sobre un mundo obsoleto e a súa loita contra a velocidade do contemporáneo.

Xénero: Serie B. Comedia negra.

O detalle: Fernando Epelde ten realizando diferentes proxectos de videoarte e videoclips para os seus proxectos musicais. Nesta 16ª edición de Cans estreará SYD, unha especie de comedia sobre a necesidade de aproximar os relatos aos feitos nunha época de posverdade e manipulación da memoria.

A LEITUGA

A LEITUGA

 

Dirección e guión: Víctor Duplá e Diana Toucedo.

Produción: Frida Films.

Vai de: Cinco familiares, tres irmáns e as parellas de dous deles, reúnense na casa da irmá maior para celebrar o aniversario do pai, que se atopa en estado de coma desde fai nove anos. O que comeza como unha celebración normal convértese nunha pelexa encarnizada por ver quen se responsabiliza dos coidados do pai.

Estado: en proceso de escritura.

O detalle: Este film nace da obra teatral A Leituga dirixida por Víctor Duplá e estreada en 2018.

TRES

TRES

 

Dirección: Juanjo Giménez

Guión: Juanjo Giménez e Pere Altimira.

Vai de: Un ex-soldado faise okupa do seu propio pasado. Unha editora de son que é quen de desincronizar o universo. Un centrocampista xogando a perder o seu último partido profesional. Tres mundos, unha película.

Estado: en proceso de escritura.

O detalle: Tres será a terceira longametraxe que dirixe, da que rodará unha parte en Galicia. Coa súa curta Timecode o director Juanjo Giménez conseguiu levar a Palma de Ouro no Festival de Cannes en 2016 e unha nominación aos Oscar en 2017.

Coa presenza de Juanjo Giménez.

UNHA VIDA DE CINE. CONTACONTOS ILUSTRADO SOBRE MARÍA CASARES [POLO CORREO DO VENTO]

UNHA VIDA DE CINE. CONTACONTOS ILUSTRADO SOBRE MARÍA CASARES [CON POLO CORREO DO VENTO]

Sábado 25 | 18h30 | Cuberto de Pato 

Prezo: 3€

Nesta actividade as nenas e nenos escoitarán unha historia narrada mentres trazan un guión debuxado dun filme –un storyboard-. A intención é achegar dun xeito didáctico como son as técnicas de realización dunha película mentres aprenden de maneira divertida os diferentes tipos de planos que existen no cine. Despois realizarán un obradoiro de debuxo da lendaria actriz galega María Casares. Este contacontos ilustrado dirixido aos máis pequenos corre a cargo de Polo Correo do Vento, un colectivo especializado en actividades lúdicas que promove a lectura, a creatividade e a comprensión oral en galego.